கிட்டதட்ட 2 வாரங்களாக நடந்த ஒலிம்பிக் போட்டி நிறைவு பெற்றது, வளரும் நாடுதான், ஆனாலும் உலககோப்பை காலபந்து, ஒலிம்பிக் போட்டி என வரிசையாக நடத்தி அசத்தி இருக்கின்றது பிரேசில். அடுத்த ஒலிம்பிக் ஜப்பானில் அவர்கள் ஒலிம்பிக் கொடி வாங்கிசென்றாகி விட்டது.
ஒலிம்பிக் என்பது எங்களிடம் உடல் ஆரோக்கியமும், போராட்டகுணமும் நிறைந்த சமூகம் இருக்கின்றது என கிரீஸ் உலகிற்கு சொல்ல தொடங்கிய போட்டிகளின் தொடர்ச்சி, நவீன ஒலிம்பிக்கும் அதனைத்தான் சொல்கின்றன.
பொதுவாக பலமான நாடுகள் என கருதபடுபவை அதனை ஒலிம்பிக்கிலும் காட்ட நினைக்கும், நாங்கள் யார் தெரியுமா? என காட்டுவார்கள்.
அதில் 100 ஆண்டுகளாக ஒலிம்பிக்கில் ஆதிக்கம் செலுத்தும் அமெரிக்கா இந்த ஒலிம்பிக்கிலும் முதலிடம் பிடித்தது, பிரிட்டன் சுதாரித்து எழுந்து இரண்டாமிடம் பிடித்தது
பெரும் சிக்கலில் குறைவான வீரர்களையே அனுப்ப முடிந்த ரஷ்யா 4ம் இடம் பெற்று அசத்தியிருக்கின்றது, முழு வீரர்களும் அனுப்பபடும் பட்சத்தில் அது முதல் மூன்று இடங்களுக்குள் பிடித்திருக்கும் என்பது சொல்லி தெரியவேண்டியதில்லை
ஜெர்மன் 5ம் இடம், ஜப்பான் 6ம் இடம், பிரான்ஸ் 7ம் இடம், தென் கொரியா, இத்தாலி, ஆஸ்திரேலியா என அடுத்த இடங்களை பிடித்து முதல் 10 இடங்களை அடைந்தன
சில போட்டிகளில் மானமிக்க மோதல் தெரிந்தது, அமெரிக்க ஈரான், அமெரிக்கா ரஷ்யா, பிரிட்டன் பிரான்சு, அமெரிக்க கியூபா, சீனா ஜப்பான், என நாடுகள் மோதும் போது களம் அதிரத்தான் செய்தது
அப்படியே ஒரு இந்தியனும் பாகிஸ்தானியும் இறுதிசுற்று மல்யுத்தமோ, ஜூடோவோ, குத்து சண்டையிலோ மோதியிருந்தால் எப்படி இருந்திருக்கும்? இதெல்லாம் நடக்காது, சோம்பேறிகளின் விளையாட்டில் வீரம் காட்டுவோம்.
இந்தியாவிற்கு 67ம் இடம், மொத்தம் பதக்க பட்டியலில் வந்த நாடுகள் 78. ஆக நமக்கு பின்னாலும் 11 நாடுகள் இருக்கின்றன, பெரும் நிம்மதி
ஆனால் அந்த 11 நாட்டிலும் பாகிஸ்தான் இல்லை, வங்கதேசம் இல்லை, இலங்கை இல்லை, எவ்வளவு ஆனந்தம்?
இந்தியா 100 தங்கம் வென்று முதலிடம் வந்திருந்தாலும் இந்த மகிழ்ச்சி கிட்டுமா கிட்டாது, பாகிஸ்தானுக்கு பதக்கமில்லை என்பது எப்படிபட்ட செய்தி, தேன் வந்து பாயுது காதினிலே பாயட்டும்.
எப்படியோ சாக்ஷியும், சிந்துவும் மானம் காத்தார்கள், தீபா கமார்க்கர் அசத்திவிட்டுத்தான் வந்தார். வாழ்த்துக்கள்
வராது வந்த மாமணியாக இங்கும் சிந்து, சாக்ஷி, தீபா என சிலர் சாதித்தாலும் அங்கு தமிழர்களின் தேடல் எப்படி இருக்கின்றது?
அவர் என்ன சாதி? ம்ம்ம்.. எங்கள் சாதி. அட பரிதாபத்திற்குரிய இந்தியாவே, இதற்கா அவர்கள் பதக்கம் வாங்கினார்கள்?, சாதி பெருமை காட்டவா அவர்கள் உயிரை பணயம் வைத்து போராடினார்கள்?
1000 ஆண்டுகள் ஆனாலும் உங்கள் சாதி ஆராய்ச்சி மாறாது, உங்களால் இந்நாடு ஒரு நல்ல விஷயமும் பெறபோவதில்லை
சரி அவர்களை விடுங்கள், மாநிலம் கடந்து சாதி ஆராய்சியில் இறங்கிவிட்டார்கள், விரைவில் அது நாடு கடக்கலாம், நவாஸ் ஷெரிப் எங்கள் சாதி என எவனாவது சொல்லும்போது வாங்கி கட்டுவான். அவர்களை விடுங்கள்
நம்மை போலவே கனவோடு இருந்த நாடுகள் எப்படி பதக்க கனவினை நனவாக்கின.
எப்படி பல நாடுகள் சாதித்தன, ஆப்ரிக்க நாடுகளான கென்யாவும், எத்தியோப்பியாவும் நீண்ட தூர ஓட்டத்தில் அசாத்தியமாக சாதிக்கின்றன, சீனா கேட்கவே வேண்டாம் சமீப 25 ஆண்டுகாலமாக ஒலிப்பிக்கில் அவர்கள் சாதனை வியப்புகுரியது
ஆப்ரிக்கர்கள் சொல்வது இப்படி, எமது மக்களிடம் திறமை இருக்கின்றது, வெளிநாட்டு பயிற்சியாளர்களை வரவழைத்து நல்ல பயிற்சி கொடுத்தோம், அவர்கள் சாதிக்கின்றார்கள்.
சீனா 30 ஆண்டுகளுக்கு முன்பு விளையாட்டில் பெரிதாக ஒன்றும் சாதிக்கவில்லை, ஆனால் பின்னாளில் வெளிநாட்டு பயிற்சியாளர்களை குவித்து பயிற்சி அளித்தது, அவர்களின் உடல்வாகு எதற்கெல்லாம் சரி வருமோ அதிலெல்லாம் சாதித்தார்கள், தென் கொரிய நிலையும் அப்படியே.
அதாவது நல்ல பயிற்சியாளர்களை இறக்குமதி செய்தின்றார்கள், பெரும் பயிற்சி அளிக்கின்றார்கள், சாதிக்கின்றார்கள்.
எமது நாட்டில் பலமாக சமூகம் இருக்கின்றது என அன்று கிரேக்கர்கள் சொன்னதை இந்நாடுகள் இன்று பெருமையாக உலகிற்கு சொல்கின்றன, நாங்களும் பலமானவர்கள். பயிற்சி மட்டும் இல்லை, அதனை பெற்றோம், உயர்ந்தோம்.
நம்மிடம் திறமை இருக்கிறதா என்றால் நிறைய இருக்கின்றது, ஆனால் பயிற்சி? உலகதரமான பயிற்சி? நிச்சயம் இல்லை. அவர்கள் பெரும் வல்லுனர்களை வரவழைக்கின்றார்கள்.
நாம் வெளிநாட்டில் இருந்து யாரை வரவழைக்கின்றோம்
சன்னி லியோன், எமி ஜாக்சன், கத்ரீனா கைப், ஜாக்குலின் பெர்னாண்டஸ்
பின் எது வளரும்?
சினிமாதான் வளரும், அதுதான் வளர்ந்துகொண்டிருகின்றது, இந்த இறக்குமதிகளின் திறமையினால் இன்னும் எதெல்லாம் வளருமோ தெரியவில்லை
No comments:
Post a Comment